Kidapawan City- (July 29, 2025) Bilang hakbang tungo sa mas environment-friendly na transportasyon, opisyal na ipinakilala ng Department of Science and Technology Region 12, katuwang ang Cagayan State University (CSU), ang isang eco-friendly na C-Trike sa Lungsod.

Isa itong de-kuryenteng tricycle na naglalayong mabawasan ang gastos sa gasolina at makakalikasang alternatibong transportasyon sa lungsod.

Handang ibahagi ng Electromobility Research and Development Center ng Cagayan State University ang teknolohiya sa pag-convert ng tradisyonal na tricycle tungo sa isang makabagong tricycle.

Ang C-Trike project ay popondohan ng DOST, kaya’t walang kailangang bayaran ang Lokal na Pamahalaan.

Humigit-kumulang isang milyon (1.1M) ang ilalaan upang masubok kung ito ay tatanggapin ng mga tricycle drivers sa lungsod.##(Djallyca Ganancial/City Information Office)

KIDAPAWAN CITY – (July 29, 2025) PANGUNAHING sektor pa rin ang Senior Citizens, na itinataguyod ng City Government sa usapin ng pagbibigay ng libreng serbisyong medikal.

Malaking pakinabang sa mga nakakatanda ang mga programang ipinatutupad ni City Mayor Atty. Jose Paolo Evangelista para matiyak na mayroon silang malusog na pangangatawan at tamang nabibigyan ng serbisyo sa ilalim ng Republic Act 9994 o Expanded Senior Citizens Act of 2020.

Sa ulat ng Office of the Senior Citizens Affairs o OSCA na kanilang inihayag nitong July 28 Convocation Program ng City Government, narito ang bilang ng mga Senior Citizens na nakabenepisyo sa iba’t ibang programa ng City Government:

Medical Consultation at Check Up (3,425), Provision of Maintenance Medicine (610) at Vitamins (759), Eye Care Program o libreng pamimigay ng salamin sa mata (600), Eye Screening for Cataract and Ptyregium (340), Ear Care Program (95) at Physical Fitness Program (555).

Mahigit naman sa 900 na Senior Citizens mula edad 80-99 at 100 years old pataas ang nabigyan ng cash gift mula sa City Government.

Mayroong 24 na nabigyan ng assistive devices habang nasa 9,440 naman ang nabigyan ng Social Pension.

Ang naturang bilang ay mula Enero hanggang Hunyo ng 2025, ayon pa sa report ng OSCA.

Mahigit sa 17,000 ang bilang ng mga rehistradong Senior Citizens sa Lungsod ng Kidapawan sa kasalukuyan. ##(Lloyd Kenzo Oasay/City Information Office)

KIDAPAWAN CITY -(July 29, 2025) Kasabay ng Convocation Program ng City Government nito lamang Lunes, July 28, ay kinilala ang kontribusyon ng GKK San Isidro Labrador ng Sitio Puas Inda ng Brgy. Amas, matapos itong makapagtanim ng dalawang daang (200) punong kahoy, bilang pakikiisa sa hangarin ng Lokal na Pamahalaan ng Kidapawan na ipanumbalik ang sigla ng kalikasan.

Maliban sa sertipiko ay ginantimpalaan din ang nasabing GKK ng Cash Incentive bilang suporta ng Lokal na Pamahalaan sa gawain ng Diyos sa simbahan.

Personal namang iniabot ni City Mayor Atty. Jose Paolo Evangelista ang parangal kasama sina City Vice-Mayor Melvin Lamata, Jr., City Councilors Bernardo Piñol, Jr., Dr. Philbert Malaluan, Dr. Ted Matthew Evangelista, Atty. Dina Espina-Chua, Jayson Roy Sibug, Mike Ablang, Carlo Agamon, Judge Francis Palmones, Jr., at LIGA President Ricardo Reforial.

Patuloy naman ang panawagan ng City Government of Kidapawan sa iba’t-ibang sektor at grupo sa lungsod na makiisa sa pangangalaga ng ating kalikasan sa pamamagitan ng pagtatanim ng mga punong kahoy para sa mga susunod na henerasyon.##(Vonkluck Herrera|City Information Office)

Kidapawan City-(July 28, 2025) TATLONG mga magigiting na mga Kidapaweños ang pinagkalooban ng pagkilala dahil sa ipinakita nilang katapatan at pagtupad sa tungkulin.

Tunay nga na marami paring tapat at mapagkakatiwalaang residente ng lungsod tulad na lamang ni Rellvienne Pearl C. Requinton, estudyante at residente ng Barangay Lanao na nagsauli ng napulot nitong P5000.00.

Pinagkalooban din ng Certificate of Commendation ang dalawang mga K-9 handlers dahil sa matagumpay na paghuli sa isang magnanakaw sa Kidapawan City Mega Market. Kinilala ang dalawang magigiting na mga empleyado na sina Joffrey E. Enriquez Jr. At Ruel N. Renegado.

Mismong si City Mayor Pao Evangelista ang nag abot ng sertipiko ng pagkilala na sinaksihan naman nina Vice Mayor Melvin Lamata Jr.

Nasa awarding ceremony din sina City Councilors Dr. Philbert Malaluan, Dr. Ted Matthew P. Evangelista, Aljo Chris Dizon, Mike Earvin Ablang, Carlo Agamon, Galen Ray Lonzaga, Atty. Dina Espina-Chua, Bernardo Piñol Jr., Atty. Francis Palmones, SK Federation President Pearly Jean Balgos at ABC President Ricardo Reforial.

Personal ding nagpaabot ng kanyang pagbati ang Alkalde ng lungsod at pinasalamatan ang mga nasabing indibidwal dahil sa katapatan at kagalingang kanilang ibinigay bilang mga Kidapaweños.##(Leo Umban/ City Information Office)

Kidapawan City- (July 28, 2025) PAGPALAGANAP ng kamalayan at pagtanggap sa mga Persons with Disabilities, ang naging sentro sa pagtatapos ng pagdiriwang ng 47th National Disability Rights Week nitong araw ng Lunes, July 28, 2025.

Daan-daang mga Persons with Disabilities mula sa ibat-ibang barangay ng Kidapawan ang nagtipon sa City Gymnasium, upang sila ay kilalanin at ipadama na kahit may kapansanan ay parte rin sila ng komunidad.

Pinangunahan ng Lokal na Pamahalaan ng Kidapawan, Persons with Disability Affairs Office o PDAO at City Social Welfare and Development Office o CSWDO ang programa.

Katuwang din ang iba’t ibang mga ahensya tulad ng Technical Education and Skills Development Authority, Department Of Labor and Employment, at Department of Agrarian Reform na tumututok sa adbokasiyang pagkakapantay-pantay, inklusibong serbisyo, at pagbibigay ng dignidad sa mga ito.

Ayon naman kay National Council on Disability Affairs Representative Dr. Mark Anthony Barroso Inocencio, ang pagdiriwang na ito ay paalala na ang mga may kapansanan ay may mahalagang gampanin sa lipunan at karapat-dapat na makamit ang pantay na oportunidad sa buhay.

Isa rin sa highlights ng nasabing programa ang pagbibigay ng Financial Aid Assistance (Stipend) para sa 216 na mga Heads of the Family mula sa Indigent Sector ng Assosasyon.

Nasa P3,000.00 ang kabuuang halaga na kanilang natanggap para sa unang semestre ng taong 2025.

Iginawad rin sa ilang mga personalidad ang Apolinario Mabini Awards na kumikilala sa mga indibidwal na malaki ang naiambag upang mas mapabuti ang buhay ng mga PWD’s. Gayundin ang mga Most Functional PWD Associtaion sa lungsod.

Hindi lamang naka sentro ang selebrasyon sa pagkilala sa kontribusyon ng mga PWD, kundi upang mapalakas pa ang suporta para sa lipunang pantay at inklusibo para sa lahat.##(Djallyca Ganancial/City Information Office)

Kidapawan City-(July 28, 2025) Nasa 300 na mga punongkahoy ang naitanim ng mga Board of Directors at mga Opisyales ng Kidapawan City Government Employees Association sa Brgy. Singao, noong araw ng Sabado, July 26, 2025.

Ang nasabing asosasyon ay binubuo ng mga Empleyado ng Lokal na Pamahalaan, na naglalayong maprotektahan at mapangalagaan ang karapatan ng bawat isa.

Ang isinagawa nilang aktibidad ay bilang pakikibahagi na rin sa nagpapatuloy na programang Canopy ’25, na nakapagtanim na ng nasa mahigit 2.8 Million na mga punongkahoy sa ibat-ibang barangay sa lungsod.

Nais ng mga miyembro ng KCGEA na makatulong sa kumonidad, at tila pagtanaw na rin ng utang na loob at pasasalamat sa City LGU na naging malaking bahagi rin ng kanilang kabuhayan.##(Ryzyl Villote/ City Information Office)

KIDAPAWAN CITY – (July 28, 2025) TINURUAN ng tamang pagtugon sa panahon ng insidente, kalamidad, aksidente, o sa kahit malakihang public events ang tatlumput walong mga kawani ng Local Government Unit at partner government agencies.

Nitong July 23-25 ay namulat ang mga kalahok sa kahalagahan ng pagtatayo at pagpapatakbo ng Incident Command System sa tatlong araw na Basic ICS course.

Napakalaki ng pakinabang ng ICS sa mga nabanggit na pangyayari, napagtanto pa ng mga kalahok.

Sa Kidapawan City, ang ICS ay binubuo ng Incident Management Team o IMT na karaniwang pinamumunuan ng Alkalde na magpaplano at magpapatupad ng mga hakbang para tumugon sa tamang paraan at tawag ng panahon.

Pinangunahan ng City Disaster Risk Reduction and Management Office o CDRRMO at ng Office of the Civil Defense o OCD ang Three days seminar workshop na ginanap sa isang hotel sa Barangay Sudapin.

Nagmula ang mga kalahok sa iba’t ibang tanggapan ng City LGU, Philippine National Police, Bureau of Fire Protection at Department of Education.##(Lloyd Kenzo Oasay/City Information Office)

KIDAPAWAN CITY-( July 28, 2025) PATULOY PANG inilalapit ng City Social Welfare and Development Office ang mga serbisyo nito sa mga residente ng malalayong barangay sa lungsod.

Ito ay sa pamamagitan ng CSWDO Desk na inilagay sa mismong Barangay Hall, kung saan ay doon na lang dudulog ang mga mamamayan kaysa bumiyahe pa papuntang sentro ng lungsod.

Sa datos na inilabas ng CSWDO nitong Flag Raising Ceremony at Convocation Program ng City Government umaga ng July 28, nakapagbigay serbisyo ang CSWDO Desk sa mga sumusunod na sektor sa mga barangay: 250 Persons With Disabilities, 558 Senior Citizens, at 60 Solo Parents.

Tumulong din ang CSWDO na mag organisa ng 4 PAG-ASA Youth Associations, 8 Barangay Children’s Associations, 3 Men Opposed VAW Everywhere (MOVE) groups, at 4 na CSWDO Community Voulnteers.

Habang nasa 52 naman ang isinagawang disaster related home validations.

Sakop ng Partial Accomplishment ng CSWDO ang mga buwan ng Enero hanggang sa kasalukuyan.

Patuloy namang nananawagan ang CSWDO sa lahat na makipag-ugnayan sa kani-kanilang Desk sa barangay upang makatanggap ng tulong at serbisyo. ##(Lloyd Kenzo Oasay/City Information Office)

Kidapawan City-(July 27, 2025) IPINAGMAMALAKI ng Kidapawan City ang isa nitong residente na unti-unti nang nakikilala sa larangan ng boksing sa Estado Unidos.

Si Jerick Padsing, 26 na taong gulang. Tatlong taon lamang siya nang lisanin ng kanyang pamilya ang Kidapawan City at nanirahan sa Amerika.

Sa loob ng dalawang dekadang pananatili sa Amerika, nahubog ang kanyang galing sa larong boksing. First love ni Padsing ang football, pero nagka interes ito sa boksing dahil idolo nito ang 8 Division People’s Champ na si Manny Pacquiao.

Ibinuhos nito ang kanyang makakaya, at buong puso na nag training hanggang sa maging professional boxer ito sa America.

Sa katunayan, hawak lang naman niya ang titulong Superflyweight Division Championship Belt kung saan nakapagtala ito ng record na 6-wins, walang talo at 3 knockouts.

Ang huling laban nga nito, hindi paman natatapos ang first round napatulog na nito ang kalaban.

Si Padsing ay pagkakalooban ng Certificate of Commendation kasabay ng gagawing flag raising ng City Government of Kidapawan bukas , araw ng Lunes ( July 28).

Umuwi ng Pilipinas, partikular sa Kidapawan City ang kampeon, dahil nais nitong makiisa sa darating na Timpupo Festival ng lungsod na magsisimula sa August 17 at magtatapos sa August 24. ##(Williamor Magbanua| City Information Office)

Kidapawan City-(July 25, 2025) Ipinagmamalaki ng Kidapawan Skills Training Institute and Assessment Center na isa sa kanilang mga 2nd batch trainees, ang kauna-unahang graduate nila na natanggap na sa United Kingdom bilang Swine Slaughterer.

Si Jayvee Lavilla na residente ng Brgy. Manongol, Kidapawan City ay sumailalim sa Slaughtering Operations Training sa KSTIAC kamakailan.

Buo ang pagsuporta ng Lokal na Pamahalaan at ng mga bumubuo sa KSTIAC sa bagong yugtong tatahakin ni Lavilla sa ibang bansa.

Ang kanyang karera sa nabanggit na lugar ay bunga na rin ng kanyang pagsisikap, tiyaga, at determinasyon na maaabot ang kanyang mga pangarap sa tulong na rin ng Lokal na Pamahalaan.

Umaaasa ang Kidapawan City LGU, na mas marami pang mga katulad ni Lavilla ang makapagtrabaho na rin sa mga kompanya sa ibang bansa kung saan nila nais ipagpatuloy ang kanilang nasimulan sa KSTIAC.##(Ryzyl M. Villote|City Information Office)