KIDAPAWAN CITY – ( August 6, 2025) LAMAN ngayon ng isang research project sa pagitan ng Department of the Interior and Local Government Region XII at ng Notre Dame of Marbel University ang pagiging consistent Seal of Good Local Governance ang Kidapawan City..

Layun ng pananaliksik na malaman ang mga good practices ng lungsod na magiging sukatan para umunlad, at makapagbigay pa ng maayos na serbisyo at pamumuno ang ibang mga Local Government Units ng SOCCSKSARGEN Region.

Nagsilbing modelo ang Lungsod ng Kidapawan sa magkasunod na pitong taong pagkakapanalo nito ng SGLG.

Kamakailan lang ay pumirma sa isang Memorandum of Agreement ang DILG XII at NDMU para sa naturang proyekto.

Nagsagawa ng interview sina NDMU Quality Assurance Director Wilter Friales at Publication Officer Kloyde Caday sa ilang mga departmento at unit heads ng City Government.

Kanilang inalam kung papaano ginawa ang mga good practices sa mga core areas ng SGLG gaya ng: Financial Administration, Disaster Preparedness, Peace and Order, Social Protection, Business-Friendliness and Competitiveness, at Environmental Management.

Ikinagalak ng team mula sa NDMU na malaman na ginagaya na rin ng iba pang LGU’s na nagsagawa ng ‘benchmarking’ sa Kidapawan City ang naturang mga good practices sa kani-kanilang mga nasasakupan.

Magsisilbing gabay ng DILG ang mga impormasyong makakalap mula sa pananaliksik ng NDMU upang mas mai-angat pa ang pamantayan sa mahusay na pamumuno ng mga Pamahalaang Lokal at pagbibigay serbisyo sa mga mamamayan.##(Lloyd Kenzo L.Oasay/City Information Office)

KIDAPAWAN CITY – (August 6, 2025) MAYROON ng Birth Certificates ang siyam na mga residente ng isang malayong barangay sa lungsod, matapos pumunta sa kanila at magbigay serbisyo ang mga kagawad ng Local City Civil Registrar’s Office o CCR.

Ikinatuwa nila ang libreng serbisyong hatid ng CCR dahil sa pamamagitan nito ay mayroon na silang opisyal na dokumentong pagkakakilanlan.

Dahil dito mas madali na silang makatatanggap ng mga serbisyo at programa mula sa Pamahalaan.

Ito ay partnership ng Philippine Statistics Authority (PSA) at ng City Government.

Pinangunahan ni Local Civil Registrar Atty. Chris Cabelin ang team na nagsagawa ng Free Birth Registration sa Purok 4 ng Barangay Sto Niño nitong hapon ng August 5.##(Lloyd Kenzo Oasay/City Information Office)

KIDAPAWAN CITY (August 6, 2025) – Ang kalusugan ang nangungunang kayamanan na nagsisislbing susi sa kaunlaran ng isang pamayanan.

Bilang pagkilala sa nabanggit, ang pakikiisa sa pagdiriwang ng Founding Anniversary ng Barangay Mua-an ay inilunsad ang Kabarangayan Dad-an ug Proyekto og Serbisyo o KDAPS 4.0 kung saan pinangunahan ng City Health Office ang libreng serbisyong medikal.

Nasa 164 na mga residente ang nakinabang sa serbisyong handog ng CHO na kinabibilangan ng libreng Medical Check-up at gamot mula sa CHO.

Nagkaroon din ng libreng Medical Examinations kabilang ang Urine, Stool, at Blood tests, libreng Tooth Extraction, pamimigay ng Complementary Baby Food para sa mga batang nagkakaedad ng 6-23 months old, at Ultrasound sa mga buntis.

Gayundin ang pamimigay ng EIC Materials hinggil sa mga Health Programs ng CHO.

Malaki naman ang pasasalamat ni Punong Barangay Debbie Perez sa programang ito ng Lokal na Pamahalaan dahil sa halip na tumungo pa ang kanilang mga residente sa lungsod para sa mga nabanggit na serbisyo ay inilapit na ito sa kanilang barangay nang libre.

Inaasahan namang magdiriwang ang mga residente ng Barangay Mua-an ng masigla at malusog dahil sa mga natanggap nilang serbisyong pangkalusugan mula sa Lokal na Pamahalaan ng Kidapawan.##(Vonkluck Herrera | City Information Office)

Kidapawan City-(August 6, 2025) Kasabay ng isinagawang Kabarangayan Dad-an ug Proyekto ug Serbisyo o KDAPS 4.0 sa Brgy. Mua-an kahapon, ay nagbigay din ng suporta ang Lokal na Pamahalaan ng Kidapawan sa mga kooperatiba ng lungsod upang mapalago at mapalawak pa ang kanilang mga produktong lokal.

Kabilang sa mga produktong kanilang ibinida ay mga coffee coaster, walis paypay, basahan, kape, sugar holder, pot holder at iba pa.

Layunin nitong maitaguyod ang mga negosyo ng kooperatiba at upang makapagbigay pa ng oportunidad sa mga miyembro nito

Ayon kay City Cooperative Development Office Head Lauro Taynan Jr., ang mga kooperatiba ay may malaking papel sa pagpapalakas ng ekonomiya.

Sa naitalang datos noong March 31, 2025, umabot na sa kabuuang 70 na kooperatiba ang nasa lungsod.##(Djallyca Ganancial/ City Information Office)

Kidapawan City-(August 5, 2025) May magandang balita para sa mga mamimili ng Lungsod —inaasahang bababa ang presyo ng karneng baboy sa mega market simula bukas August 6, 2025.

Sa isinagawang pagpupulong kahapon, August 4, 2025 ng mga vendors at kinatawan ng Lokal na Pamahalaan, ang pagbaba ng presyo sa karne ng baboy ay bunsod ng pagdami ng stocks ng mga produkto.

Patuloy na pinaaalalahanan ang mga mamimili na maging mapanuri sa presyo at kalidad ng kanilang binibili.

Hinihikayat din ang mga tindero na sumunod sa suggested retail price para matiyak ang patas na presyo.##(Djallyca Ganancial/City Information Office)

Kidapawan City- (August 5, 2025) Sa Barangay Mua-an ang naging destinasyon ng buong Team ng Kabarangayan Dad-an ug Proyekto ug Serbisyo o KDAPS 4.0 ngayong araw August 5, 2025.

Naging sulit ang pagdalo ng mga residente ng barangay sa programa, bukod kasi sa mga serbisyong dala ng grupo para sa lahat, ay may Friendly Basketball Game at mga Larong Pinoy din na inihanda para sa mga mamamayan nito.

Bumida sa basketball game ang mga Barangay Officials ng Mua-an, laban sa koponan ng Team Pogi kasama ang mga Chairpersons ng ibat-ibang barangay gayundin ang mga City Officials. Kung saan itinanghal na panalo ang BLGU Mua-an.

Bukod sa cash prizes, nagsilbing bonding na rin ng mga taga Barangay ang mga isinagawang Larong Pinoy dahil nagpapakita ito ng kanilang matibay na samahan sa kumonidad. Lahat ay pwedeng makasali mula sa mga bata, hanggang sa mga Senior Citizens.

Ikinatuwa rin ng mga naroon ang Zumba Dance Competition, at humataw sa dancefloor ang mga kalahok.

Ilan lamang ito sa mga bahagi ng programang KDAPS na naglalayong mapasaya at mapangiti, ang lahat ng mga nakiisa sa kanilang pagdalaw sa mga barangay sa Lungsod.##(Ryzyl M. Villote/City Information Office)

Kidapawan City-(August 5, 2025) PINILAHAN at mas tinangkilik ng mga mamamayan ng Barangay Mua-an, Kidapawan City ang murang bigas na ibenebenta ng City Agriculture’s Office kasabay ng isinagawang Kabarangayan Dad-an ug Proyekto ug Serbisyo (KDAPS) nitong Martes, August 5, 2025.

Sa halaga kasing P50.00 ay makakabili na ng tatlong kilo ng bigas, higit na mas mura kung ikukumpara sa mga bigas na ibenebenta sa merkado.

Nilinaw ng City Agri Office na bagaman at kahalintulad ng denorado rice ang kulay ng murang bigas, ito ay isang uri ng commercial rice na maganda pa naman ang kalidad.

Ayon kay City Agriculturist Marissa Aton, nasa proseso sila ng pagpapatuyo’t ng palay sa warehouse gamit ang mechanical drier ng nagkaroon ito ng discoloration.

Nanghihinayang din kasi ang ahensiya na itapon ito dahil mapapakinabangan paman din daw ng mga mamamayan.

Sa katunayan kahit nga ang mga taga City Hall ay bumibili ng ganitong klase ng bigas at wala naman daw itong pagkakaiba sa mga commercial rice na nasa Mega Market o mga nasa pampublikong pamilihan.

Mabibili ang ganitong uri ng bigas kapag mayroong KDAPS sa mga barangay. Maliban sa bigas, mabibili din ang mga sariwang Tilapia at mga murang gulay sa display booth ng City Agriculture’s Office.

Mula sa mga magsasaka ng lungsod ang ibenebentang mga murang gulay na binibili ng City Government sa pamamagitan ng programang buy back program..##(Williamor Magbanua/City Information Office)

Kidapawan City-(August 5, 2025) Sunod-sunod na panalo ang naitala ng Kidapawan City Mynas Football Club sa ibat-ibang Football Competition nitong buwan ng Hunyo at Hulyo ngayong taon.

Kinilala ng Lokal na Pamahalaan ng Kidapawan kasabay ng Monday Convocation Program nito (August 5, 2025), ang panalong naiuwi ng grupo at ng mga miyembro nito matapos silang makipagtagisan ng galing sa mga kompetisyon.

Kasama sa grupo ang itinanghal na 2nd Runner Up sa IBERCUP 2025, International Youth Football Tournament na sina Xian Jude Aranas at JJ Warguez na ginanap sa Lisbon, Portugal na pawang mga manlalaro ng KCMFC.

Lumaban din sila sa 2025 Youth Football League na ginanap sa Alabang Country Club sa Muntinlupa City, Metro Manila kung saan naiuwi naman nila ang 2nd Runner Up sa U15 Category.

Hinirang din ang grupo bilang 1st Runner up sa U16 Category ng 1st Davao Striker Football Cup na ginanap rin sa Davao City noong July 12, 2025. Sila rin ang 2nd Runner Up sa U12 Category ng JC Football Tournament sa parehong lungsod.

Patunay na ang mga Football Players mula sa lungsod, ay kasing galing na rin ng mga Atleta mula sa ibang bansa. Bagay na karapat-dapat ding ipagmalaki ng mga Kidapaweños.##(Ryzyl M. Villote/ City Information Office)

KIDAPAWAN CITY (August 4,2025) – BILANG pagbibigay halaga sa mga nai-ambag ng mga lingkod bayan sa Kidapawan City Government, kinilala nito ang pagpupunyagi at ang pagsisikap na maipasa ang mga pagsusulit sa Career Professional Examination ng Civil Service Commission (CSC) o sa kahit anumang mga Licensure Examinations.

Sina Renz Mangawang at Katlyn Satera ay kinilala matapos na matagumpayan ng mga ito ang napakahirap na pagsusulit ng CSC.

Samantalang nagawa ring ipasa ni Anelyn Paña ang Licensure Examination for Teachers (LET). Ang mga lisensiyang ito ay magagamit ng mga nabanggit na mga empleyado sakaling mahirang sila na mga Regular Employees.

Bakas sa kanilang mga mukha ang kagalakan at tuwa habang tinatanggap ang Sertipiko ng Pagkilala mula sa mga matataas na opisyal ng lungsod.

Ang kanilang tagumpay ay katuparan upang mas lalo pang linangin ang kanilang kakayahan at kahusayan sa paglilingkod para sa mga Kidapaweños.##(Vonkluck Herrera | City Information Office)

Kidapawan City – (August 4, 2025) Kung pagalingan lang naman sa pagbibisekleta ang pag-uusapan, hindi pahuhuli diyan ang taga Kidapawan City na nasungkit ang hindi lang isa kundi apat na kampeonato sa katatapos lang na BMX Cebu 2025 Competitions.

Si Jhemson Alonzo, tubong Kidapawan City at empleyado ng Cotabato Electric Cooperative (COTELCO) kinilala bilang kampeon sa BMX Longest Gap, Highest Bunny Hop, Best Rail at tinanghal bilang 2nd Place sa Pro category.

Ibinuhos ng manlalarong si Alonzo ang kanyang lakas at galing upang talunin ang iba pang mga kalahok sa patimpalak na mula sa ibang mga bayan ng Visayas at Mindanao.

Nitong Lunes (August 4, 2025), ginawaran ng pagkilala si Alonzo at pinalakpakan ng mga empleyado ng City Government kasabay nang isinagawang flag raising ceremony.

Hindi rin maitago ang galak ng mga opisyal ng Kidapawan habang iniabot sa kampeon ang Sertipiko ng Pagkilala mula sa Lokal na Pamahalaan.

Patunay na ang Kidapawan City ay mayaman sa mga magagaling na potensiyal hindi lang sa turismo, negosyo kundi maging sa pagkakaroon ng mga mahuhusay sa larangan ng ibat-ibang isports. (##Leo Umban / City Information Office)