Kidapawan City-(July 21, 2025) Bilang pagkilala sa tagumpay at dedikasyon ng mga empleyado, binigyang-parangal ng Lokal na Pamahalaan ang ilang mga LGU Employees sa Kidapawan City ang mga nakapasa sa Career Service Examination.

Kaya naman nito lamang umaga ng Lunes, July 21, 2025 kasabay ng isinagawang Convocation Program ng City Government, mainit na binati ng mga kawani ng gobyerno ang mga empleyadong nagpakita ng determinasyon sa pagsusulit. Pumasa sa CS Professional exam sina Katlyn W. Satera, Karen Joy A. Osiones, Marion Jill E. Basarte at Jake Isabelo G. Pacate.

Pumasa din si Kristine G. Leong sa CS Subprofessional Examination.

Ang tagumpay ng mga empleyado ay dahil sa tulong ng Program on Awards and Incentives for Service Excellence o PRAISE, na nagsusulong na masuportahan ang kakayahan ng mga empleyado tungo sa mas epektibong serbisyong publiko.

Sa katunayan may mga programa ang Kidapawan City Government kung saan isinailalim sa review ang mga empleyado na wala pang eligibility upang mas mapadali para sa mga ito ang makapasa sa CSC exams.##(Djallyca Ganancial/City Information Office)

Kidapawan City-(July 21, 2025) IKINABABAHALA ni City Mayor Pao Evangelista ang mga ulat na nakakarating sa kanyang tanggapan, hinggil sa umanoy muling pagiging aktibo ng illegal na droga at mga nagbebenta nito sa lungsod.

Ibinunyag ito ng alkalde sa isinagawang flag raising ceremony na dinaluhan ng mga empleyado ng City Government, kabilang na ang mga National Line Agencies tulad ng Philippine National Police at Bureau of Fire Protection.

Agad na ipinag utos ni Mayor Pao, ang pagsasagawa ng mahigpit na monitoring at kung maaari ay hulihin ang mga sangkot sa pagbebenta at pag-gamit ng illegal drugs sa lungsod.

Inanunsiyo din ng opisyal ang pagsasagawa ng random drug testing sa lahat ng mga Elected Officials na lubha namang ikinagulat ng marami.

Maging ang mga Department Managers ay kasama din sa kinunan ng urine samples, upang patunayan na hindi gumagamit ang mga ito ng ipinagbabawal na gamot.

‘’Bag-o ta manglimpyo sa atong palibot aning hisgutanan sa droga, ato sa limpiyuhan ang atong kaugalingong tugkaran. Ug kini manukad sa atoang mga empleyado sa gobyerno’’ Ayon kay Mayor Pao.##(Williamor Magbanua/City Information Office)

KIDAPAWAN CITY – (July 21, 2025) Sa layuning muling ibalik ang ganda ng kalikasan, pinatunayan ng mga Gagmay’ng Kristohanong Katilingban (GKK) na maaasahan din sila sa pagtatanim ng mga puno maliban sa pagtatanim ng Salita ng Diyos.

Mahalaga ang partisipasyon ng mga GKK’s sa hangarin ng Kidapawan City Government na makapagtanim ng milyon-milyong puno, upang suportahan ang programang Canopy ‘25 na isinusulong ni Kidapawan City Mayor Pao Evangelista.

Kasabay ng isinagawang convocation program nitong Lunes (July 21), iginawad din sa GKK ng Sitio Fatima Barangay Junction, ang Certificate of Recognition bilang pasasalamat ng Lokal na Pamahalaan sa kanilang pakikiisa sa programa.

Nasa 150 na mga puno lang naman ang kanilang itinanim sa mga bakanteng lupain sa kanilang barangay.

Mismong si Mayor Pao, kasama ang mga miyembro ng 20th Sanggunian sa pangunguna ni Vice Mayor Melvin Lamata, ang nagkaloob ng sertipiko ng pagkilala sa GKK ng Barangay Junction.(##Leo Umban / City Information Office)

KIDAPAWAN CITY – (July 21, 2025) BINIGYANG PUGAY ni City Mayor Atty. Paolo Evangelista, ang mga bagong appointed and promoted employees ng City Government sabay ang pagbibigay suporta sa mga ito.

Umaga nitong Lunes, July 21, ng sabay-sabay na nabigyan ng kanilang Oaths of Offices ng alkalde, ang mga bagong hinirang na mga pinuno ng kanilang departamento at iniangat na mga kawani ng Lokal na Pamahalaan.

Sabay sabay na nanumpa ang mga Department Heads na sina Asst. City Administrator Janice Garcia, City Local Civil Registrar Atty. Christoper Cabelin, City Cooperative Development Officer (CCDO) Lauro Taynan Jr., City Budget Officer Grace Tayuan, City Information Officer Williamor Magbanua,at Assistant CCDO Myla Gundran.

Habang na promote naman sina Chuna Lawagon bilang Administrative Aide I ng Economic Enterprise Management Office, Dennis Marasigan Local Legislative Staff Assistant III, Annalyn Largo Senior Administrative Assistant I, at Joan Parilla Administrative Assistant III na mula naman sa Office of the Secretary to the Sanggunian

Hinikayat ni Mayor Pao, ang mga nabanggit na kawani na pagbutihin pa ang kanilang trabaho alang alang sa mahusay na pagbibigay serbisyo publiko.##(Lloyd Kenzo L. Oasay/City Information Office)

Kidapawan City- (July 19, 2025) Nagkatipon para sa isang makabulohang Fun Run Event ang aabot sa 661 na mga Kidapaweño, upang makiisa sa adbokasiya na labanan ang ibat-ibang uri ng Trafficking.

Ang “Takbo Laban sa Trafficking” ay pinangunahan ng Lokal na Pamahalaan ng Kidapawan kasama ang Kidapawan City Inter-Agency Committee Against Trafficking in Person- Violence Against Women and their Children (KCIACAT-VAWC) at ng City Social Welfare and Development (CSWD) bilang bahagi ng pagdiriwang ng World Day Against Trafficking in Person sa darating na July 30.

Ang nasabing aktibidad ay may layuning maipalam, matukoy, malabanan at maiwasan na maging biktima ng Trafficking at matigil na rin ang ganitong pang-aabuso sa kapwa.

Ilan sa mga nakiisa ay mga kawani ng City LGU, mag-aaral mula sa Central Mindanao Colleges, mga representante mula sa Kidapawan City PNP, Bureau of Jail Management and Penology, Bureau of Fire Protection, Department of Environment ang Natural Resources, mga miyembro ng mga Running Community sa lungsod, at ilan pang mga mamamayan.

Nagpaabot rin ng mensahe ng kanilang pagsuporta sa programa sina City Councilors Dina Espina-Chua, Dr. Ted Matthew Evangelista at Mike Ablang gayundin si City Local Government Operations Officer Julia Judith Geveso.

Personal ring nakisalamuha sa mga naroon sa programa si CSWD Officer Daisy Gaviola at ang mga kasamahan nito upang magbigay ng mga Information Dissemination Materials, na may mga impormasyong dapat malaman ng publiko tungkol sa usapin ng Trafficking.

Isa lamang ang nasabing FunRun event sa mga aktibidad na inihanda ng Kidapawan City LGU, sa pakikiisa nito sa kampanya ng pagsalba at pag-protekta sa mga mamamayan ng lungsod sa banta ng pang-aabuso at kasiraang dulot ng mga traffickers.##(Ryzyl Villote/City Information Office)

Bukas na para sa publiko mula 8:30 AM ang “KADIWA NG PANGULO” na matatagpuan sa City Pavilion ngayong araw July 19, 2025.

MABIBILI RITO ANG MGA SUMUSUNOD:

Bigas – P29 per kilo

Frozen & ready-to-cook Tilapia

Assorted Gulay at Prutas

Ang programang ito ay naging posible sa pagtutulungan ng City Government of Kidapawan, kasama ang Office of the City Agriculturist, katuwang ang DA-Region XII at NIA-Cotabato.

Presyong abot-kaya, para sa lahat!

Punta na sa City Pavilion at mamili!

KIDAPAWAN CITY- (July 18, 2025) Isa sa mga pangunahing balakid sa pagtanggap ng mga benepisyo ng gobyerno ay ang kakulangan sa papeles, partikular na ang katibayan sa pagkakakilanlan kagaya ng birth certificate. Kung kaya at ang mismong tanggapan na ng City Civil Registrar ang lumapit sa mga barangay upang ihandog ang libreng birth registration sa mga mamamayan ng lungsod na wala pa nito.

Isinagawa ang launching ng nasabing programa nito lamang araw ng Lunes, July 14, na may temang, “Identity is a right. Access must be free”, sa Barangay Singao na pinangunahan ni City Civil Registrar Officer Atty. Christopher Cabelin, kung saan abot sa apatnapung (40) indibidwal ang nakinabang.

Ayun kay Atty. Cabelin, ang inisyatibong ito ay ang pinakaunang bilin ni City Mayor Atty. Jose Paolo Evangelista sa kanya, matapos syang maitalaga sa posisyon nito lamang Hulyo, na naging posible sa pamamagitan ng pakikipagtulungan ng CCR sa Philippine Statistic Authority o PSA.

Dagdag pa niya na gagawin ding libre ng kanyang tanggapan ang notarization ng Certificate of Live Birth at Affidavit of Two Disinterested Persons, gawa ng siya din naman ay abogado, gayundin ang delivery ng mga birth certificate sa mga pintuan ng mga recipient, sampung (10) araw pagkatapos itong mapost.

Bibigyan naman ng tatlong araw ang mga tumanggap upang iwasto ang mga detalye na nasa kanilang Birth Certificate, saka ito isumite sa Central Office ng PSA.

Bilang tugon naman sa panawagan ng City Government ay ginawang libre ni Punong Barangay Eduardo Loma ang pagbigay ng Barangay Certificate of Residency at Indigency, para sa mga nais makinabang sa nabanggit na programa.

Samantala, nakatakda namang bumisita ang CCR sa Brgy. Amas sa darating na July 31, 2025, at Brgy. Junction sa August 6, 2025 upang ihatid ang kaparehong serbisyo. Kailangan lang nilang ihanda ang kanilang Affidavit of Two Disinterested Persons, Omnibus Certification, at Certificate of Indigency.##(Vonkluck Herrera | City Information Office)

Kidapawan City- (July 18,2025) Door to door na ipamamahagi sa lahat ng mga Estudyanteng Kidapaweños ang Cash Subsidy, na matatanggap ng mga mag-aaral sa Elementarya at Highschool sa Lungsod ng Kidapawan.

Ang Cash Subsidy na nasa P500.00 para sa mga regular learners at P1000.00 para sa mga PWD Learners, ay bahagi ng patuloy na pagsuporta ng Lokal na Pamahalaan sa sektor ng Edukasyon.

Mismong si Kidapawan City Mayor Atty. Jose Paolo Evangelista ang nag-anunsyo nito, at nagbigay direktiba na ang mga kawani ng City LGU ang pupunta sa mga paaralan sa lungsod.

Ang Cash Subsidy ay isa sa mga programang ipagpapatuloy ng Lokal na Pamahalaan, katuwang ang lahat ng mga Taxpayers sa lungsod na may layuning makatulong sa mga gastusin ng mga mag-aaral.

Hindi lamang mga estudyante ang nagpahayag ng kanilang malaking pasasalamat sa programang ito, pati na rin ang kanilang mga magulang.

Ang bawat ngiti ng mga kabataang nakatanggap ng tulong pinansyal, ay simbolo rin ng pagiging epektibo ng nabanggit na programa. Sa ganitong paraan, magiging magaan ang pagsisimula nila ng kanilang panibagong school year at pag-abot ng kanilang mga pangarap. ##(Djallyca Ganancial & Lloyd Kenzo Oasay/ City Information Office)

Kidapawan City-(July 15, 2025) MAGANDANG balita ang hatid ni City Mayor Atty. Jose Paolo M. Evangelista, para sa mga Casual employees ng Kidapawan City Government.

Sa darating kasi na taong 2026, ang mga empleyadong nasa casual position ay may pagkakataon nang maging regular na lingkod bayan.

Inanunsiyo ito ni Mayor Evangelista, sa isinagawang convocation program nitong araw ng Lunes, July 14, kung saan binigyang diin nito ang kahalagahan ng mga mangagawa sa Lokal na Pamahalaan na nagsilbi na sa loob ng mahabang panahon.

‘’Within our term, ang atong mga qualified na mga casual employees atua nang ipa-regular tanan,’’ wika ng alkalde.

Nauna nang sinabi ni Mayor Evangelista sa isinagawang Capacity Development Session For Newly Elected Officials and Executive Briefing On The State Of Local Governance, na ginanap sa Davao City na ayaw nitong nagagamit sa politika ang mga casual employees ng pamahalaan.

Sa datus mula sa City Human Resource Management Office (CHRMO), mayroong 63 (animnapu’t-tatlong), mga casual employees ang city government.

Sinabi ni Rose Astudillo, ang City Human Resource Management Officer, na karamihan sa mga casual workers ay mahigit sampung taon nang nagseserbisyo sa gobyerno.

Pumasa narin ang mga ito sa pagsusulit ng Civil Service Commission (CSC), kaya kwalipikado sila para sa proposed regularization sa taong 2026.##(Williamor Magbanua/ City Information Office)

Kidapawan City- (July 15, 2025) Sa layuning matulungan ang mga kabataang hirap magbasa, ay ipinakilala ng Department of Social Welfare and Development o DSWD ang Tara, Basa! Tutoring Program.

Nito lamang araw ng Lunes, July 14, 2025 ginanap ang Culmination activity ng Tara, Basa! Tutoring Program sa Kidapawan City Gymnasium na nilahokan ng daan-daang mga learners mula sa City Schools Division.

Kinilala at binigyang puri ang dedikasyon ng mga tutors at Youth Development Workers o YDW’s, na naging tulay sa mga kabataan at mga magulang nito sa pagpapatibay ng kakayahan sa pagbabasa.

Nagbahagi naman ang ilang mga tutors at YDW’s sa kanilang mga karanasan, kung saan inilahad nito na ang pagbabasa ay hindi lamang sa ikauunlad ng bata kundi susi rin sa pag-unlad ng komunidad.

Ayon kay Director III and Deputy Program Manager TBTP-NPMO Director Elma S. Salamat, ipinagmamalaki nila ang mga tutors at YDW’s sapagkat nagpakita sila ng malasakit sa mga kabataan para sa kanilang kinabukasan.

Kabilang sa mga nakiisa sa aktibidad sina City Mayor Atty. Jose Paolo M. Evangelista, CSWD Officer Daisy Gaviola, PESO Manager Herminia Infanta, Senior LEO Supervising LEO Mansour Jesu Kairos Orfrecio, mga kinatawan ng DSWD FO XII, mga representante ng DepEd Kidapawan City Division at iba pang mga partner agencies na sumuporta sa mga programa.

Kasabay naman ng pagtatapos ng programa ay ang pagsasagawa ng payout para sa mga magulang ng mga kalahok.##(Djallyca Ganancial/City Information Office)