KIDAPAWAN CITY LEDIPO, NOMINADO SA PRESIDENTIAL RECOGNITION FOR OUTSTANDING DEVELOPMENT PARTNERS NG DTI-MSMED COUNCIL

CITY INFORMATION OFFICE July 14, 2025

Kidapawan City- (July 14, 2025) Ang adhikaing matulungan ang mga Micro, Small and Medium Enterprises sa lungsod ng Kidapawan ang isa sa programang ginagawang posible ng Lokal na Pamahalaan ng Kidapawan sa tulong ng Local Economic Development Office ng Lungsod.

Matatandaang nagsasagawa ang LEDIP Office ng mga aktibidad, pagsasanay, pagtitipon ng mga Supplier at MSME gayundin ang taonang Christmas Bazaar, at iba pang mga MSME Bazaar na malaki ang naitutulong sa mga malaliliit na negosyante.

Dito nabigyan sila ng pagkakataon na maipakilala ang kanilang mga produkto at madagdagan ang kanilang kita.

Ang mga pagsisikap na ito ng Lokal na Pamahalaan kasama ang mga kawani at Partner agencies nito, ang isa sa nakikitang dahilan ng Department of Trade and Industry-MSMED Council upang maging kwalipikadong nominado ang City LGU.

Ang pagkilala sa naturang nominasyon ay natanggap ng Kidapawan City LGU noong July 10, 2025 sa pagdiriwang ng Micro, Small, and Medium Enterprise Development Week sa General Santos City.

Mismong si LEDIP Officer Gillan Ray Lonzaga at mga kasamahan nito ang tumanggap ng nasabing parangal, na personal na iniabot ni DTI Regional Director Flora Gabunales.

Sa isinagawang Monday Convocation Program, ay ibinahagi ng LEDIP Office ang tagumpay na ito sa mga Opisyales at lahat ng bumubuo ng Lokal na Pamahalaan ng Kidapawan.

Ang nasabing nominasyon ay bunga ng mga pagsisikap ng Kidapawan City LGU, na maging matagumpay sa kanilang kabuhayan ang mga maliliit na negosyante sa lungsod.##(Ryzyl M. Villote/ City Information Office)