KIDAPAWAN GENERAL HOSPITAL FUNDING UNANG MAGIGING PRAYORIDAD NG SANGGUNIANG PANGLUNGSOD
CITY INFORMATION OFFICE
July 3, 2025
KIDAPAWAN CITY – (July 3, 2025) TINIYAK ng Sangguniang Panlungsod na uunahin nilang paglalagakan ng pondo ang operasyon ng Kidapawan City General Hospital na tinatapos na ng City Government sa kasalukuyan.
Ito ang sinabi ni City Vice Mayor Melvin Lamata, Jr sa kanyang talumpati sa pagbubukas ng kauna-unahang Regular Session ng 10th Sangguniang Panlungsod nitong umaga ng Huwebes, July 3.
Isa ang naturang pagamutan sa mga flagship program sa ikalawang termino ni City Mayor Atty. Paolo Evangelista na naglalayung mabigyan ng libreng pagpapagamot ang mga Kidapawenos.
Napakalaki ng pakinabang na hatid nito sa mamamayan lalo na doon sa mga maralita na halos wala o hirap magbayad ng pagpapa-ospital.
Tinatapos na ng City Government ang gusali ng ospital na matatagpuan sa Duhat Drive ng Barangay Poblacion.
Kaugnay nito, kanya kanya ring naghain ng kani-kanilang mga priority legislation ang mga bagong nahalal na kasapi ng konseho.
Nabigyan sila ng pagkakataong ihayag ito sa pamamagitan na rin ng kanilang mga privilege speech sa regular session.
Ang 10th Sangguniang Panlungsod ay binubuo nina : Vice Mayor at Presiding Officer Melvin Lamata Jr, City Councilors , Dr. Philbert Malaluan MD, Dr.Ted Evangelista MD, Aljo Cris Dizon, Mike Ablang, Jason Roy Sibug, Carlo Agamon, Galen Ray Lonzaga,Atty. Dina Espina – Chua, Bernardo Pinol Jr, at Atty. Francis Palmones Jr.
Sina Liga ng Barangay President Ricardo Reforial at Sangguniang Kabataan City Federation Chair Pearly Jean Balgos ang mananatiling mga ex-officio members naman ng 10th Sanggunian.##(Lloyd Kenzo Oasay/City Information Office)
